“Neftçi” komandası bu gün UEFA Avropa Liqasında növbəti oyununu keçirəcək.
Paytaxt təmsilçisi III təsnifat mərhələsinin ilk matçı çərçivəsində İsarilin “Bney Yehuda” klubunu qəbul edəcək. “Bakcell Arena”da baş tutacaq görüş saat 21:00-da start götürəcək.
Mübarizəyə I təsnifat mərhələsindən qoşulan “Neftçi” əvvəlcə Moldovanın “Sperantsa” komandasını məğlub edib. Roberto Bordinin rəhbərlik etdiyi kollektiv səfərdə rəqibini Emin Mahmudov, Stiven Monroz və Rəhman Hacıyevin qolları ilə 3 cavabsız qolla üstələyib. Bakıda isə darmadağın qeydə alınıb – 6:0. Bakılıların heyətində Vangelis Platellas dubl edib. Emin Mahmudov, Dario Frederiko, Jozef Monroz və İsmayıl Zülfüqarlı isə hərəyə bir dəfə fərqləniblər.
“Neftçi” II təsnifat mərhələsində qarşılaşdığı Rusiya “Arsenal”ını da hər iki görüşdə məğlub edib. “Ağ-qaralar” Tulada Dario Frederikonun yeganə qolu ilə qalib gəliblər – 1:0. Frederiko Bakıda baş tutan cavaq matçından da fərqlənib. Həmçinin 3:0 hesablı qalibiyyətdə Rauf Əliyevlə Mamadu Mboc da adlarını tabloya yazdırıblar.
Cari mövsümdə mübarizəyə II raundan qatılan “Bney Yehuda” ikinci dəfə Avropa Liqasında Azərbaycan təmsilçisinə rəqib olub. Komanda 2009/2010 mövsümündə I təsnifat mərhələsində hər iki görüşdə “Simurq”u məğlub edib.
