Ermənistan rəhbərliyi özü də etiraf edir ki, Azərbaycanla sərhədi delimitasiya etmək lazımdır.
Bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinqdə İrəvanın Kollektiv Təhlükəsizlik Müqaviləsi Təşkilatının (KTMT) mövqeyini tənqid etməsinə münasibət bildirərkən deyib.
Zaxarova Ermənistan hakimiyyətinin KTMT-yə qarşı ictimai tənqidlərinin davam etməsindən təəssüfləndiyini bildirib.
Onun sözlərinə görə, Təşkilatın katibliyi KTMT-nin nizamnamə məqsəd və prinsiplərinə tam uyğun olaraq respublika qarşısında bütün öhdəliklərin qorunduğunu təsdiqləyib.
“Heç kəs şübhə etmir ki, KTMT-nin məsuliyyət zonasına Ermənistanın ərazisi daxildir”, – Zaxarova deyib.
Rusiya Xarici İşlər Nazirliyinin rəsmi nümayəndəsi qeyd edib ki, Ermənistan rəhbərliyinin özü də etiraf edir ki, delimitasiya danışıqları çərçivəsində yerlərdə Azərbaycanla sərhəd xəttini dəqiqləşdirmək lazımdır. O əlavə edib ki, İrəvan mübahisəli ərazilər və anklavlarla bağlı məsələlərin həll edilməli olduğunu qəbul edir.
“Ermənistan rəhbərliyinin özü müəyyən yaşayış məntəqələrinin Azərbaycana qaytarılmalı olduğu haqda qərar verirsə, KTMT günahkardır?” – Zaxarova deyib.
