Bir müddət öncə “Formula 1” yarışlarının builki təqvimindən çıxarılan İstanbul Qran-Prisi yenidən cədvələ qaytarıla bilər.
“Anadolu” agentliyinin məlumatına görə, bunu mərhələnin təşkilatçısı olan “Intercity İstanbul Park” şirkətinin idarə heyətinin sədri Vural Ak bəyan edib.
O qeyd edib ki, hazırda 11-13 iyun tarixlərində keçirilməli olan Qran-Pri üçün fərqli tarix axtarışları və bu istiqamətdə aparılan işlər davam edir.
“Formula 1” rəhbərliyi də burada yarışların keçirilməsində çox istəklidir. Ümid edirik ki, ötən il Türkiyəyə yaşatdığımız qüruru, bu il də təkrar edə biləcəyik”, – deyə Vural Ak bildirib.
