Gündə nə qədər qəhvə içməyin insult riskini azaltdığı müəyyən edilib.
Bunu Çinin “Soochow” Universitetinin alimlərinin apardıqları tədqiqat üzə çıxarıb.
Onlar gündə iki-üç fincan qəhvə içməyin kardiometabolik xəstəliklər, o cümlədən 2-ci tip diabet, koronar ürək xəstəliyi və insult riskini azaltdığını sübuta yetiriblər.
Tədqiqatın nəticələri “Journal of Clinical Endocrinology & Metabolism” elmi jurnalında dərc olunub.
Elm adamları 172,3 min iştirakçının qidalanma vərdişlərini və sağlamlıq vəziyyətlərini təhlil ediblər. Beləliklə, kofeinin kiçik dozalarının kardiometabolik multimorbidlik riskini əhəmiyyətli dərəcədə azaltdığı aşkarlanıb.
“Kardiometabolik multimorbidlik” birləşməsi maddələr mübadiləsi və ürək-damar sistemi ilə əlaqəli iki və ya daha çox xroniki xəstəliyin eyni vaxtda mövcudluğunu ifadə edir. Kardiometabolik xəstəliklər qrupuna şəkərli diabet, koroner ürək xəstəliyi, infarkt və insult daxildir.
Alimlərin fikrincə, iki-üç fincan sadə qəhvədə bu cür patologiyaların qarşısını almaq üçün lazım olan kofein miqdarı var. Hər gün bu miqdarda qəhvə istehlak edən iştirakçılarda, ümumiyyətlə qəhvə içməyənlərə nisbətən bu cür problemlərin inkişaf ehtimalı 48,1% azdır.
