Ermənistanda Kərki və Başkəndin “barter” ediləcəyi iddiaları gündəmə gəlib.
Ermənistan xarici işlər naziri Ararat Mirzoyan hakim “Vətəndaş müqaviləsi” partiyasının təşəbbüs qrupunun qapalı görüşündə iştirak edib. Görüşün təfərrüatı məlum deyil.
“Hraparak” nəşri isə mənbələrindən görüşün müəyyən detallarını öyrənib.
Nəşr yazır ki, iki saat davam edən iclasda səslənən fikirlər Ermənistanın xarici siyasəti ilə bağlı nikbin əhval-ruhiyyə yaratmayıb.
“Yaxın gələcəkdə Ermənistanın vəziyyəti daha da ağırlaşacaq. Mənbəmiz bildirib ki, yeganə optimist məqam anklavlarla bağlı məsələdir. Mirzoyan qeyd edib ki, delimitasiya kontekstində anklavlar məsələsi “barter”lə həll edilə bilər. “Bizdə olan bizdə, onlarda olan onlarda qalır” prinsipi tətbiq edilə bilər. Beləliklə, Tiqranaşen (Kərki) Ermənistanda, Artsvaşen (Başkənd) Azərbaycanda qalır”, – nəşr iddia edir.
Qeyd edək ki, Gədəbəyin Başkənd kəndi SSRİ dövründə ermənilərə bağışlandıqdan sonra Azərbaycan daxilində “erməni anklavı” olaraq qeydə alınıb. Ermənistan Başkəndin qaytarılmasını istəyir, Azərbaycan isə bundan imtina edib. Çünki bu ərazilər Azərbaycana məxsusdur.
Görüşdə Rusiyanın regional problemlərin həllində, xüsusilə kommunikasiyanın blokadadan çıxarılmasında aktivlik nümayiş etdirməsinin Ermənistanın maraqlarına uyğun olmadığı vurğulanıb.
“Mirzoyan bildirib ki, Rusiya istədiyinə nail olmaq üçün hər şey etməyə hazırdır. O əlavə edib ki, ABŞ-da keçiriləcək seçkilərin nəticələri Ermənistan üçün narahatedicidir. Putinin dostu Tramp qalib gələrsə, bu, Ermənistan üçün müsbət perspektiv vəd etmir. Mirzoyan COP-29 tədbirində iştirak üçün Bakıya gedib-getməyəcəklərinə də toxunub. Qeyd edib ki, bu haqda hələ qərar verilməyib. Xarici işlər naziri demarkasiya komissiyalarının imzaladığı reqalementə də qısaca toxunub. Bildirib ki, onlar hələ demarkasiya olunacaq növbəti ərazinin hara olacağına qərar verməyiblər”, – nəşr yazır.
