Avstraliya, Sinqapur və Çindən olan beynəlxalq alimlər qrupu saç tökülməsinin səbəblərini anlamaqda irəliləyiş əldə ediblər.
Tədqiqat “Nature Communications” (NatComms) elmi jurnalında dərc olunub.
Siçanlar üzərində apardıqları təcrübələrdə onlar MCL-1 zülalının saçın böyüməsi və bərpasından məsul olan saç follikulunun kök hüceyrələrinin (HFSC) fəaliyyətində kritik rolunu müəyyən ediblər.
Mütəxəssislər, aktivləşdirilmiş saç follikulunun kök hüceyrələrinin düzgün işləməsi üçün qoruyucu protein MCL-1 tələb etdiyini aşkar ediblər. Bu zülal olmadan hüceyrələr stresə düşür və nəticədə ölür, geri dönməz saç tökülməsinə səbəb olur.
Xüsusilə əhəmiyyətli bir kəşf MCL-1 və P53 zülalları arasındakı qarşılıqlı əlaqə olub. Alimlər müəyyən ediblər ki, saç follikulunun kök hüceyrələri yeni saçların böyüməsi üçün aktivləşdirildikdə, MCL-1 çatışmazlığı stressə səbəb olur və bu, hüceyrə ölümü prosesini tətikləyən P53 zülalını aktivləşdirir.
P53 geni silindikdə, saç böyüməsi MCL-1 olmadan da bərpa edilib, bu, saç follikullarının həyat dövrünün tənzimlənməsində bu zülallar arasında mürəkkəb bir tarazlığın olduğunu göstərir.
Tədqiqatın ayrıca mühüm aspekti MCL-1 istehsalını artıraraq kök hüceyrə fəaliyyətini saxlayan ERBB siqnal yolunun rolunun kəşfi idi. Bu məlumatlar saçların təbii böyümə mexanizmlərini stimullaşdıran dərmanların yaradılması üçün əsas ola bilər.
Dünya əhalisinin təxminən 2%-ni əhatə edən alopesiya çətin tibbi problem olaraq qalır. Saç follikullarının həyat dövrünü tənzimləyən molekulyar mexanizmlərin yeni anlaşılması bu xəstəliyin əsaslı şəkildə yeni müalicə üsullarının inkişafına ümid verir.
Alimlər vurğulayırlar ki, növbəti addım bu nəticələrin insan toxumasında sınaqdan keçirilməsi və spesifik terapevtik yanaşmaların hazırlanması olacaq.
