İsrailin ixtiyarında olan “Dəmir günbəz” raket əleyhinə müdafiə sistemi həmin ölkənin lazımi səviyyədə müdafiəsini təmin edə bilməz. O, bəzi İran raketlərini və pilotsuz təyyarələrini tutmaq üçün nəzərdə tutulmayıb.
Bu barədə “The Wall Street Journal” məlumat yayıb.
“İranın “Dəmir Qübbə”nin dayandıra bilməyəcəyi pilotsuz təyyarələri və ballistik raketləri var”. Hizbullah isə yüksək dəqiqlikli raketlər də daxil olmaqla on minlərlə raket arsenalına malikdir. Onların buraxılması İsrailin hava hücumundan müdafiə sistemini həddən artıq yükləyə bilər”, – qəzet yazır.
Bu cür təhlükələrin qarşısını almaq üçün daha böyük hava hücumundan müdafiə sistemi hazırlanmışdır. Bu sistemə İsrail, ABŞ və digər hava qüvvələri, eləcə də qonşu ölkələrin radiolokasiya stansiyaları daxildir. Əməliyyatlar ABŞ Mərkəzi Komandanlığı tərəfindən koordinasiya edilir.
Sistemin yaradılması İsrailə hətta rəsmi diplomatik əlaqələri olmayan ərəb ölkələri ilə də əməkdaşlıq etmək imkanı verir, – “The Wall Street Journal” yazır.
Qeyd edək ki, İsraillə İran arasında münaqişə HƏMAS-ın siyasi bürosunun rəhbəri İsmayıl Haniyənin öldürülməsi səbəbindən kəskinləşib. Bundan əlavə, ABŞ dövlət katibi Entoni Blinken Yaxın Şərqdə hərbi əməliyyatların mümkün eskalasiyasından narahatlığını ifadə edərək, bunun gözlənilməz və idarəolunmaz nəticələrə gətirib çıxara biləcəyini vurğulayıb. O, həmçinin qeyd edib ki, ABŞ yaranmış vəziyyət kontekstində İsraili dəstəkləməyə davam edəcək.
