Bakı Slavyan Universitetinin (BSU) Tədris işləri üzrə prorektoru, professor Telman Cəfərovun verdiyi məlumata görə,
Ümumdünya Səhiyyə Təşkilatı tərəfindən pandemiya elan olunmuş koronavirus (COVID-19) epidemiyasının yaratdığı mövcud vəziyyətlə əlaqədar olaraq Azərbaycan Respublikası Nazirlər Kabineti yanında Operativ Qərargah tərəfindən elan olunmuş tətil və məzuniyyət günlərində yaz semestri üzrə tədris materiallarını tələbələrə çatdırmaq, onların imtahan sessiyasından əvvəlki hazırlığına nail olmaq məqsədilə BSU-da distant təhsil texnologiyalarının tətbiqi yolu ilə online-virtual dərslər davam etdirilir. Qeyd edək ki,bununla bağlı BSU-nun rektoru, professor Nurlana Əliyeva müvafiq əmr vermiş, həmin əmr əsasında təlimat hazırlanaraq professor-müəllim və tələbə heyətinə təqdim olunmuşdur.
Distant təhsil texnologiyaları ilə tədrisin məsafədən təşkili olunması üçün
universitet bütün resurslarını səfərbər etmiş və malik olduğu elektron tədris
platformasının funksionallığını artıraraq tələbələrin ixtiyarına vermişdir.
Hazırda www.tedris-bsu.org portalında kafedraların bir-biri ilə çevik
əlaqə saxlaması üçün korporotiv elektron poçt ünvanlarına giriş üçün şəxsi kabinet istifadəyə verilmiş və rəsmi sənədlərin fasiləsiz dövriyyəsi təmin olunmuşdur.
Tələbələrin mövcud elektron tədris resurslarına çıxışının təmin olunması,
bütün mühazirə mətnlərinin əldə edilə bilməsi, həmçinin hər bir fənn üzrə imtahan sualları, sillabuslar və auditoriyadankənar saatlara aid işlərin mövzularının əlçatan olması üçün elektron tədris platformasında fakültə, ixtisas və akademik qruplar üzrə xüsusi bölmələr açılmış, bütün zəruri tədris materialları tyutorlar tərəfindən
virtual qovluqlara yerləşdirilmişdir.
Maksimum tələbə heyətinin distant təhsil texnologiyaları vasitəsi ilə
keçirilən dərslərdə daha həvəslə iştirak etmələri və motivasiya aləti olaraq
davamiyyətin monitorinqini aparmaq və tələbələrin hazırlıq reytinqini müəyyən
etmək üçün elektron jurnal modulundan da istifadə edilir. Elektron jurnala zəif
nəticə göstərən tələbələrin qiyməti və davamiyyət qeyd olunmur. Elektron jurnal sistemi sadəcə müəllimlərə onlayn dərslərdə iştirak etməyən tələbələri müəyyən edərək onların dərslərdən geri qalmaması üçün digər imkanlardan istifadə edə bilməsinə şərait yaradır.
Bununla yanaşı, Avropa İttifaqının ERASMUS+ proqramının BSU-nun qoşulduğu PETRA layihəsi çərçivəsində tələbə və müəllimlərin istifadəsinə verilən
“Moodle” elektron tədris platformasında da təlimlər uğurla davam etdirilir.
Bundan əlavə, BSU Azərbaycan Respublikası Təhsil Nazirliyinin tövsiyə etdiyi “Microsoft Teams” platformasında da istifadə etməkdə
maraqlıdır. Layihə qoşulmaq üçün universitet artıq bütün tələbə və müəllim heyətinin qeydiyyat formasını nazirliyinin müvafiq şöbəsinin elektron poçtuna göndərmişdir.
BSU-nun rektoru tərəfindən imzalanmış əmrdə dərslərin dayandırıldığı mövcud
vəziyyətdə kredit sistemi əsasında tədrisin təşkili qaydalarına uyğun distant təhsil vasitələri və texnologiyaları ilə tələbələrin imtahanlaraqədərki cari fəaliyyətinin diqqətdə və nəzarətdə saxlanılması və qiymətləndirilməsi yolları və mexanizmləri aydın şəkildə təsvir olunub. Elektron informasiya texnologiyaları şöbəsi tələbələrin müxtəlif tədris-məlumat resursları bazalarından istifadəsinə, tədris portalları və platformalarına çıxışına dəstək verir.
