![](https://ictimaixeber.az/wp-content/uploads/2020/12/usdollar.jpg)
2020-ci ilin yanvar-noyabr aylarının sonuna olan xarici valyutada nağd mübadilə əməliyyatlarının həcmi açıqlanıb.
Göstəricilərdə ABŞ dolları, ingilis funt sterlinqi, avro və rus rublu üzrə mübadilə əməliyyatlarının həcmi təqdim edilib.
Belə ki, 2020-ci ilin 11 ayı ərzində banklar tərəfindən 1 milyard 44,7 milyon ABŞ dollarının alışı həyata keçirilib. 3 milyard 145,5 milyon ABŞ dollarının isə satışı təmin edilib. 2019-cu ilin cari dövrünə nisbətən banklar tərəfindən dolların alışı 37,1 faiz azalıb, satışı isə 35,1 faiz çox olub.
Bu dövr ərzində 10 milyon 352,9 min dəyərdə ingilis funt sterlinqinin alışı həyata keçirilib. Eləcə də, banklar tərəfindən 18 milyon 358,9 min funt sterlinqi həcmində satış baş tutub. Cari valyuta vahidi üzrə alış ötən ilə nisbətən 20,1 faiz çox olub, satış isə 30,2 faiz azalıb.
Yanvar-noyabr ayları ərzində banklar tərəfindən 70 milyon 633,1 min avro həcmində alış baş tutub. Bu dövr ərzində 219 milyon 484,3 min dəyərdə avro satışı təmin edilib. 2019-cu ilin müvafiq dövrü ilə müqayisədə avronun alışı 64,9 faiz və ya 2,8 dəfə azalıb, cari valyuta üzrə satış həcmi də 58,6 faiz və ya 2,4 dəfə azalıb.
İlin əvvəlindən noyabr ayının sonuna olan göstəriciyə əsasən, 12 milyard 665,1 milyon Rusiya rublunun alışı həyata keçirilib. Cari dövrdə 2 milyard 506,2 milyon rus rublunun satışı banklar tərəfindən təmin edilib. Rus rublunun alışı ötən ilə nisbətən 8,6 faiz azalıb. Həmçinin, rublun satışı da 2019-cu ilin 11 ayı ilə müqayisədə 23,3 faiz az olub.
Qeyd edək ki, digər üç valyutanın (avro, funt sterlinq, rubl) satış həcmləri, yəni, vətəndaşlar tərəfindən alışı azalsa da dolların əhali tərəfindən alışı ötən ilin eyni dövrü ilə müqayisədə artıb.