Klublar arasında təşkil olunan şahmat üzrə onlayn Avropa Kubokunda Azərbaycanın “Odlar Yurdu” komandası final mərhələsində mübarizə aparacaq.
“Odlar Yurdu” qrupu lider kimi başa vuraraq finalda mübarizəni davam etdirmək imkanı əldə edib. Şəhriyar Məmmədyarovun lideri olduğu komanda qrupda keçirdiyi beş görüşdə iki heç-heçə edib və üç qələbə qazanıb. “Odlar Yurdu” V turda Azərbaycanın digər komandası olan “Təhsil İdman” klubunu 3:1 məğlub edib. “Təhsil İdman” qrup sonuncusu – altıncısı kimi turnirlə vidalaşıb.
Bu gün Bakı vaxtı ilə saat 16:30-da final mərhələsinə start veriləcək. Dairəvi sistemlə iki gün keçiriləcək finalda “Odlar Yurdu”nun rəqibləri bu komandalardır: “Ladya”, “Mednı Vsadnik” (hər ikisi Rusiya), “Hamburqer Şaxklub”, “Daytsizau” (hər ikisi Almaniya), “Klişi Eşek 92” (Fransa), “Novı Bor” (Çexiya), “Qildford” (İngiltərə), “Poland Husars” (Polşa), qadın şahmatçıların yarışında isə Avropa Kubokunun son qalibi kimi “Serkl Deşek 92” (Monako).
Qeyd edək ki, qalib komandaya “Monte Karlo Kuboku” və dörd min avro veriləcək. Gümüş medalçı üç min, bürünc mükafatçı isə iki min avro alacaq. Dördüncü və beşinci yerləri tutan komandalar isə müvafiq olaraq 1 500 və 1000 avro qazanacaq.
