“Azərbaycan artıq Fransaya qarşı tədbirlər sistemini həyata keçirir. Xarici İşlər Nazirliyimiz artıq ikinci dəfədir ki, Fransanın buradakı müvəqqəti nümayəndəsini nazirliyə çağırdı. Azərbaycanın Fransaya verdiyi nota ona təqdim olundu. Bundan başqa, Milli Məclisdə Fransanın dörd iri şirkəti ilə bağlanmış müqavilələrə yenidən baxmaq məsələsi gündəmə gətirildi. Ən önəmlisi, Birinci Vitse-prezident Mehriban xanım Əliyevanın atdığı çox böyük addım idi. 18 il YUNESKO-nun xoşməramlı səfiri kimi yüksək fəaliyyət göstərən Mehriban xanım qabaqlayıcı addım atdı. Onun xoşməramlı səfir statusundan imtina etməsi çox yüksək səviyyəli de-marş kimi dəyərləndirilməlidir”.
Bunu açıqlamasında politoloq Cümşüd Nuriyev deyib.
Politoloq bildirib ki, hazırda Azərbaycan mediası çox böyük hücumla Fransanın üzərinə gedir:
“Məsələlər qaldırılır ki, Fransanın Əlcəzairdə törətdiyi soyqırımları açılsın. Yəni bu istiqamətdə bir çox işlər görülür. Daha nə etmək olar? Fransadakı səfirliyimizin bağlanması, səfirin geri çağrılması məsələsi də Milli Məclisdə səslənib. Bu, yeni fikir deyil. Azərbaycan Fransanı baykot elan edə bilər. Biri var, bunu vətəndaşlar edir, biri də var dövlət.
Doğrudur, Fransa ilə böyük dövriyyəmiz yoxdur. Bununla yanaşı, həmin nüansın özü böyük bir siyasi addımdır. Bundan başqa, Azərbaycanın Xarici İşlər Nazirliyi BMT-nin Təhlükəsizlik Şurasına Fransanın son addımları ilə bağlı müraciət etməlidir. Düzdür, Fransa Təhlükəsizlik Şurasının beş daimi üzvündən biridir. Amma ən azından biz bu məsələləri gündəmə gətirməliyik ki, Fransa özünü tərəfsiz kimi təqdim etməsinə baxmayaraq, tərəf tutur.
Ermənistanla bağlı qeyri-qanuni, qızışdırıcı mövqeyə keçdi. Üstəlik, Senatda qəbul olunan son sənədlə Ermənistanla bağlanacaq sülh müqaviləsinə maneə törətdi. Bu cür məsələlərə görə Azərbaycan parlamenti AŞPA-ya da müraciət ünvanlaya bilər. Yəqin ki, bu kimi məsələləri nəzərə alacaqlar. Bu istiqamətdə Fransaya qarşı çıxışları davam etdirmək lazımdır. Bütün addımları atmışıq, elə bir addım qalmayıb ki, ürəyimizi soyutmaq üçün həmin addımı da ataq”.
Tural Turan
