Sentyabrın 14-də yeni tikilmiş Astara rayonu Burzubənd kənd tam orta məktəbinin açılış mərasimi keçirilib.
Açılış mərasimində Təhsil Nazirliyinin İnsan resursları şöbəsinin müdiri Eşqi Bağırov, Astara Rayon İcra Hakimiyyətinin başçısı Qəzənfər Ağayev, Astara Rayon Təhsil Şöbəsinin müdiri Rəşad Həsənov iştirak edib.
Qeyd edilib ki, yeni tikilmiş məktəb 360 şagird yerlikdir. Məktəbdə 12 sinif otağı, üç laboratoriya, iki texnologiya, informatika, gənclərin çağırışaqədərki hazırlığı kabinetləri də fəaliyyət göstərəcək.
Həmin gün Cəlilabad şəhəri 9 nömrəli tam orta məktəbin də tikintidən sonra açılış mərasimi keçirilib.
624 şagird yerlik tədris binasında 25 sinif otağı, altı laboratoriya, iki texnologiya, informatika və gənclərin çağırışaqədərki hazırlıq kabinetləri də var.
Açılışdan sonra məktəbin sinif otaqları, laboratoriya, idman zalı, akt zalı ilə tanışlıq olub.
