ABŞ, Almaniya, Finlandiya və digər ölkələrdən olan beynəlxalq astronomlar qrupu Yer və Ay ilə asteroidlərin toqquşması təhlükəsi ilə bağlı qiymətləndirməsini yeniləyib.
Tədqiqat “Research Notes of the AAS” elmi jurnalında dərc olunub.
Təhlil planetimizə potensial düşmə riski ilə əlaqədar alimlərin narahatlığına səbəb olan “2024 YR4” asteroidi ilə bağlı müşahidələrin nəticələrinə əsaslanıb.
Kanar adalarında 2,5 metrlik NOT teleskopundan istifadə edən mütəxəssislər kosmik obyektin trayektoriyasını və parametrlərini daha yaxşı hesablaya biliblər.
“James Webb” Kosmik Teleskopu ilə aparılan infraqırmızı işıqda müşahidələr isə asteroidin ölçüsünü daha dəqiq müəyyən etməyə kömək edib. Onun ölçüsü 46-74 metr təşkil edir.
Monitorinq 2025-ci ilin may ayına qədər davam edəcək, bundan sonra YR4 2028-ci ilə qədər müşahidə olunmayacaq. Çünki o, 2028-ci ildə növbəti yaxınlaşmaya qədər Yerdən aşkar edilməyəcək hala gələcək.
Ölçünün müəyyən edilməsi astronomlara Ayla toqquşmanın potensial nəticələrini qiymətləndirməyə kömək edəcək.
