Qərb Rusiyanın Ermənistandakı təsirini zəiflətməklə bütün regionda Moskvanın təsirini zəiflətməyə ümid edir.
Bu fikri politoloq Beniamin Poqosyan “Sputnik Ermənistan”a müsahibəsində bildirib.
Ötən həftə ABŞ dövlət katibinin Avropa və Avrasiya məsələləri üzrə müavini Ceyms Obrayen Ermənistana səfər edib. İrəvanda o, baş nazir Nikol Paşinyan və xarici işlər naziri Ararat Mirzoyanla görüşüb, həmçinin Ermənistan və ABŞ arasında Strateji Dialoqun yekun iclasında iştirak edib. Və bir gün əvvəl dövlət katibinin başqa bir müavini Riçard Verma da İrəvana gəlib.
“Ermənistan həmişə Rusiyanın Cənubi Qafqazda əsas dayağı hesab edilib və Qərb hesab edir ki, Rusiya-Ermənistan münasibətlərinə xələl gətirməklə, Moskvanın təsirini bütün regionda zəiflədə bilər”, – ekspert qeyd edib.
Politoloqun sözlərinə görə, Ermənistan-Amerika münasibətlərində müəyyən irəliləyiş 2019-cu ildə strateji dialoqun ilk sessiyasının keçirildiyi vaxtdan başlayıb. Bununla belə, o, əmindir ki, Birləşmiş Ştatlar Cənubi Qafqaza heç vaxt böyük əhəmiyyət verməyib və bu, Vaşinqtonun ilk on prioritetinə belə daxil olmayıb.
“Postsovet regionu, ilk növbədə, Rusiyanın təsirinin azaldılması kontekstində ABŞ-ı 2022-ci ilin fevralından sonra, Rusiya ilə bütün sahələrdə, Ukrayna ərazisində də hərbi baxımdan açıq qarşıdurma başlayandan sonra maraqlandırmağa başladı”, – politoloq vurğulayıb.
Eyni zamanda o qeyd edir ki, Ermənistan-Rusiya münasibətlərindəki böhran, xüsusən də siyasi və hərbi sahədə göz qabağındadır. Xüsusilə, Ermənistan artıq Rusiyadan silah almır, yüksək səviyyəli rəsmilər səviyyəsində əlaqələr saxlanılıb, lakin digər səviyyələrdə dondurulub.
“Amerikalılar Ermənistan-Rusiya münasibətlərində transformasiyalar görür və təbii ki, İrəvanla münasibətləri intensivləşdirməyə çalışır, onu getdikcə Rusiya ilə münasibətləri məhdudlaşdırmağa sövq edir”, – politoloq qeyd edib.
Onun fikrincə, ABŞ rəsmilərinin səfərləri həm də aprelin 5-də Brüssel görüşü və bununla bağlı razılaşmalarla bağlıdır
“Əgər Ermənistan həqiqətən də Rusiyadan üz döndərmək istəyirsə, o zaman ilk növbədə asılılığını azaltmalıdır. Söhbət ilk növbədə iqtisadi amildən gedir. Belə olan halda, ola bilsin ki, Aİ və ABŞ hansısa yolla Ermənistan üçün başqa ixrac bazarları, alternativ enerji mənbələri axtarır. Bu, Rusiya ilə ABŞ arasında davam edən birbaşa qarşıdurma kontekstində Rusiyanın təsirini, ilk növbədə, postsovet məkanında azaltmaq istəyinə uyğun gəlir”, – Poqosyan əlavə edib.
Bütün bunlardan Ermənistanın nə qazanacağı ilə bağlı sualı cavablandıran politoloq əmindir ki, ABŞ Ermənistana qanuni qüvvəyə minmiş təhlükəsizlik zəmanəti verməyəcək.
O, ikitərəfli sazişləri – məsələn, ABŞ-ın Yaponiya, Cənubi Koreya, Filippin və digər ölkələrlə imzaladığı sazişləri istisna edir.
“Ola bilər ki, Azərbaycana və ya Türkiyəyə siyasi vədlər, mesajlar olsun ki, onlar Ermənistana təzyiq etməsinlər ki, İrəvan Rusiyadan “qopa bilsin”, – politoloq deyib.
Bundan əlavə, Poqosyanın fikrincə, ABŞ-ın məqsədinin reallaşması və Rusiyanın regionu tərk etməsi üçün Ermənistanla Azərbaycan arasında sülh müqaviləsi lazımdır. Ona görə də bu vəziyyətdə dövlətlər Azərbaycanı heç olmasa çərçivə sazişi imzalamağa inandırmağa çalışacaqlar. Bunun ardınca Ermənistan-Türkiyə münasibətlərinin normallaşması baş verəcək ki, bu da öz növbəsində İrəvana Moskvadan uzaqlaşmaq imkanı verəcək. Əgər təbii ki, Ermənistanın belə bir istəyi varsa.
