Bu günlərdə 5G-nin ilk sınağı Bakının mərkəzində, Fəvvarələr meydanında keçirilib. Deməli, 5G ölkəmizə də ayaq açıb
Avropa Birliyi, ABŞ və Böyük Britaniyadan koronavirus pandemiyası ilə bağlı daxil olan qorxulu xəbərlərin fonunda bəzən mətbuatın nəzərindən qaçan, o qədər də əhəmiyyət verilməyən informasiyalara da rast gəlirik.
Mobil qüllələrin məhv edilməsinin 5G şəbəkəsi ilə bağlı olduğu aşkarlanıb
Məsələn, aprelin əvvəlindən başlayaraq Böyük Britaniyada bir qrup şəxs 20-yə yaxın mobil əlaqə qülləsini yandırıb. İlk belə hal Birminhemdə qeydə alınıb, daha sonra ölkə üzrə vandalizm aktlarının sayı dayanmadan artıb. Mobil qüllələrin məhv edilməsinin 5G şəbəkəsi ilə bağlı olduğu da aşkarlanıb, çünki sosial mediada 5G-nin koronavirusun yayılması ilə əlaqəsi olduğu barədə xeyli məlumat paylaşılıb. Guya virus bu şəbəkənin vasitəsi ilə yayılıbmış.
Virusun yayılmasından qəzəblənən britaniyalılar da mobil qüllələri yandırıblar. Özü də həm 3, həm də 4G şəbəkəsinə xeyli ziyan dəyib. Məhv edilmiş 5G qüllələrinin bir çoxu isə heç işlək deyilmiş, yəni hələ test dövründə imiş.
Britaniyanın ardınca bir həftə sonra eyni aktlar həm də Niderlandda təkrarlanıb. Yeni texnologiyanın əleyhdarları 4 qülləni yandırıblar. Hadisə yerində polis 5G texnologiyasından imtinaya dəvət edən yazılar da tapıb. Niderlandda yeni nəsil mobil əlaqənin əleyhinə bəzi qruplar çıxış edirlər. Kimisi şəbəkənin sağlamlığa ziyan olduğunu, kimisi də şəxsi həyatın toxunulmazlığını poza biləcəyini iddia edir.
5G texnologiyasının 2020-ci ildən başlayaraq dünyanın aparıcı ölkələrində tətbiqi nəzərdə tutulub. Əvvəlki 4G ilə müqayisədə bu texnologiya inqilabi sıçrayış sayıla bilər. Bu şəbəkənin köməyi ilə olduqca böyük həcmli informasiyanı çox qısa müddətdə ötürmək mümkündür.
Belə bir halda Böyük Britaniya və Niderland kimi inkişaf etmiş ölkələrdə belə halların baş verməsi qəribə görünə bilər. 21-ci əsrdə yaşayırıq, təhsil-tərbiyə sistemi yüksək səviyyədə qurulub, mümkün olan bütün texnoloji imkanların vasitəsi ilə bəşəriyyət hər biliyə yol tapıb. Bu tərəfdən də aparıcı ölkələrdə mobil qüllələri kimsə yandırmaqla məşğul olur.
Biri iş yerini, digəri isə sağlamlıq və şəxsi həyatını qorumaq üçün bu işi görür
Bunun baş verməsinin bir neçə səbəbi var. Tarixə nəzər yetirək. 17-ci əsrdə İngiltərədə baş verən burjua inqilabı olduqca böyük texnoloji sıçrayışa yol açdı. Dayanmadan yaradılan zavod, fabrik və manufakturalar bir tərəfdən ölkəni inkişafa apardı, digər tərəfdən isə yüz minlərlə insanı işsiz qoydu. Köhnə peşələr sıradan çıxdıqca, yeni iş yerlərinə tələbat yaranırdı. Texnologiya insan əməyini həm yüngülləşdirirdi, həm də iş yerlərinin ixtisarına zəmin yaradırdı. Əsrlərlə bir peşənin daşıyıcısı olan ailələr yeni ixtisasa sahib olmağa məcbur olurdular. Digər tərəfdən sənaye inqilabı da yerində dayanmırdı, yeni dəzgahlar buraxılırdı.
İşsiz qalan fəhlələr bu dəzgahları məhv etməklə prosesin qarşısını almağın mümkün olduğunu düşünürdülər. Bu gün şəbəkə qülləsini yandıran qruplarla 19 əsrdə dəzgahı dağıdan fəhlə arasında mahiyyətcə elə bir fərq yoxdur. Biri iş yerini, digəri isə sağlamlıq və şəxsi həyatını qorumaq üçün bu işi görür. İstər 19, istər 21-ci əsrin adamı məhz yeni texnologiyanı məhv etməklə problemi həll etməyin mümkün olduğunu düşünür.
Bizim qorxumuz bədnəzərdir, onu da üzərliklə qovuruq
5G qüllələrini koronavirusun yayılması səbəbindən yandıran insan isə orta əsrlərdə cadugər ovuna çıxandan heç nə ilə fərqlənmir. O dövrdə vəba, yatalaq, taun kimi qorxulu xəstəliklərin qarşısını ala bilməyin avropalılar adətən günahkar axtarmaq, kimisə tonqalda yandırmaqla xəstəlikdən qurtulmağın mümkün olduğunu düşünürdülər. Bəzən ağlını itirən kütlə hansısa varlı insanın imarətinə, ya bir alimin evinə od da vura bilərdi. Allahın cəzasına gəldiyini düşünənlər, günahları yumaq üçün hər uydurmanı qəbul etməyə hazır idilər.
Müasir dünyada sosial şəbəkədə koronavirusun 5G vasitəsilə yayıldığı iddia edilən feyk xəbəri oxuyan, daha sonra isə qülləni yandırmaqla məşğul olan britaniyalı ilə orta əsrdə cadugəri tonqalda yandıran inkvizisiya arasında bir oxşarlıq duyulur. İnsanın xəstəlik qarşısında instinktiv, primitiv qorxusu onu hər cür mənasız hərəkətə sövq edir. O qədər də dəhşətli olmayan pandemiya həmin bu qorxuları aşkarladı.
İnkişaf edən ölkələrdə 5G qüllələrini yandırmaqla məşğul olanların fonunda Azərbaycanda belə hallara, demək olar, rast gəlinmir. Bu günlərdə 5G-nin ilk sınağı Bakının mərkəzində, Fəvvarələr meydanında keçirilib. Deməli, 5G ölkəmizə də ayaq açıb. Özü də hələ 4G-dən hələ əməlli-başlı yararlana bilmədiyimiz halda. Amma uzaq rayonlarda interneti olmayan nə qədər kənd var. 3G ilə güclə internetə daxil olmağa cəhd edən həmvətənlimizin hələ Britaniyada yandırılan 5G qüllələrindən xəbəri yoxdur, onun dərdi heç olmasa bildiyi-tanıdığı xəbər saytına daxil olmaqdır.
Hər millətin öz qorxusu var, ingilis yenilikdən qorxur deyə 5G-ni yandırmaqla özünə təskinlik verir. Bizim qorxumuz qüllə və ya yeni texnologiya qorxusu deyil. Bizim qorxumuz bədnəzərdir, onu da üzərliklə qovuruq
