Bu gün Azərbaycanda ilk televiziyanın yaradılmasından 64 il ötür.
1956-cı il fevralın 14-də Azərbaycanda ilk televiziya – Bakı televiziya studiyası (indiki AzTV) fəaliyyətə başlayıb. Bu, həm də Şərqdə ilk televiziya idi.
Məhz həmin gün Azərbaycan insanı günə görkəmli aktrisa Nəcibə Məlikovanın “Göstərir Bakı!” kəlməsi ilə başlayıb. N.Məlikova çıxışında tamaşaçıları televiziyanın fəaliyyətə başlaması münasibətilə təbrik edib. Daha sonra “Bəxtiyar” bədii filmi nümayiş etdirilib. Lakin texniki səhvlər ucbatından film səssiz yayımlanıb.
Bakı studiyası əvvəlcə həftədə iki, sonra üç dəfə 2 saatlıq proqramla efirə çıxırdı. 1957-ci ildən həftədə 5 dəfə çıxmağa başladı və verilişlərin gündəlik həcmi 2 saat 20 dəqiqəyə çatdırıldı. 1962-ci ildə gündəlik efirə çıxan proqramların həcmi 7 saatadək artdı.
70-ci illərdən etibarən Azərbaycan televiziyasının gündəlik veriliş və proqramlarının yayım həcmi 10 saata, 80-ci illərdə 18 saata çatdırıldı.
2005-ci ilin yanvarından isə televiziya 24 saatlıq fasiləsiz yayıma keçdi.
