“Yanlışları araşdıran və doğruları söyləyən jurnalistlər olmadan heç bir cəmiyyət azad ola bilməz”.
Bunu BMT Baş katibi Antonio Quterreş yayımladığı videomüraciətdə deyib.
“Keçən il 62 jurnalist vəzifə başında öldürülüb. Son illərdə korrupsiya və insan hüquqları pozuntularını araşdırarkən öldürülən jurnalistlərin sayı artıb”.
O əlavə edib ki, jurnalistlərə qarşı törədilən hər 10 cinayətdən doqquzu cəzasız qalır.
Qeyd edək ki, bu ilin iyun ayında Azərbaycanda iki jurnalist vəzifə başında erməni aqressiyasının qurbanı olub. Belə ki, Azərtac-ın əməkdaşı İbrahimov Məhərrəm Əli oğlu və AzTV-nin operatoru Abışov Sirac Abış oğlu işğaldan azad olunmuş ərazilərin çəkilişini həyata keçirərkən nəqliyyat vasitəsinin Kəlbəcər rayonunun Susuzluq kəndi ərazisində erməni təxribatı nəticəsində tank əleyhinə minaya düşməsi zamanı şəhid olublar.
