Bakıda saxta “İvanovka” məhsullarını kim satır?

0
564

Bu gün mağazalarda satılan, üzərində İvanovka adı yazılan yağ, pendir, şor və bu kimi məhsulların hamısı saxtadır. İşbazlar əhalinin Sovet illərindən İvanovka məhsullarına olan marağından istifadə edir. Bu gün Azərbaycanda hələ mənim tanıdığım iki firma – “Uzun ömür” MMC və “Qafqaz” MMC İvanovka mal adı altında çox sayda saxta süd məhsulları hazırlayır.

Bu sözləri  Azad İstehlakçılar İctimai Birliyinin sədri Eyyub Hüseynov mağazalarda satılan saxta İvanovka məhsulları ilə bağlı danışarkən deyib.

E.Hüseynov bildirib ki, 10 ildən çoxdur ölkədə saxta “İvanovka” adı altında satılan məhsullar və onun istehsalçıları ilə mübarizə aparır.

Sədr bildirib ki, bu məhsulların İvanovka kəndinə heç bir aidiyyəti yoxdur:

“İvanovka kəndində yerləşən Nikitin kolxozunun sədri və İsmayıllı rayonunun keçmiş başçısı ilə bu barədə dəfələrlə danışmışam. Bu danışıqlar zamanı məlum olub ki, “İvanovka” adı altında saxta məhsullar hazırlayıb satan adını çəkdiyim iki MMC Nikitin kolxozu ilə saxta müqavilə imzalayıb. Müqavilədə göstərilir ki, guya həmin MMC-lər kolxozdan süd məhsulları alır. Ancaq apardığımız tədqiqatlar göstərib ki, həmin saxta məhsulları hazırlayan firmalar kolxozdan heç bir süd məhsulu almır, imzalanmış müqavilə də saxtadır. Bakı ətrafında yerləşən bu iki MMC-nin illərdir satışa çıxardığı məhsulların İvanovkla kəndinə heç bir aidiyyəti yoxdur”.

E.Hüseynov bildirib ki, bununla bağlı dəfələrlə İqtisadiyyat Nazirliyinə müraciət edilib:

“Bakıda hazırda saxta İvanovka məhsullarının satışını həyata keçirən 20 obyekt fəaliyyət göstərir. Cəmi 3 mağaza var ki, həqiqətən də İvanovka məhsullarının satışını həyata keçirir. O mağazalar da Sovet illərindən fəaliyyət göstərən mağazalardır”.

E.Hüseynov bildirib ki, bu günə qədər heç bir müəssisə “İvanovka” mal nişanını dövlət qeydiyyatına aldırmayıb:

“Bu ad altında satılan məhsullar yalançıdır və ifşa olunmalıdır. Bizim illərdir apardığımız mübarizəyə baxmayaraq, cəmi 2 mağazanın bağlanmasına nail olmuşuq. Ancaq insan sağlamlığına ziyan olan, mənşəyi məlum olmayan saxta ad altında hazırlanan bu qidaların satışını həyata keçirən obyektlərin hamısı bağlanmalıdır”.